Berekraftig nothandtering

Offentlig prosjektsammendrag

Selstad er ein internasjonal leverandør av kompetanse og utstyr til maritime næringar. Vi har over 60 års drift, og leverer kvalitetsprodukt som er basert på lang erfaring og god kunnskap innan samtlege av våre fagområder. Desse områda inkluderer oppdrettsutstyr, fiskereiskap, tauproduksjon, sikkerheitsutstyr og utstyr til industri og offshore. Vår spisskompetanse ligger spesielt innan oppdrettsutstyr og fiskereiskapar. Til oppdrettsnæringa tilbyr vi analyser av nye anlegg, vasking, bøting, impregnering og leveransar av oppdrettsposar, skjørt, og fortøyingsutstyr. Service på oppdrettsnøter er eit stort og viktig verksemdområde for Selstad. Det er svært mange oppdrettsmerdar i Noreg. Alle desse nøtene skal til ei kvar tid fungere optimalt og vere rømmingssikre. Her er difor eit stort transportbehov og mykje material som går med til naudsynt emballering for å kunne transportere dette til og frå service. Selstad er opptatt av å bidra til berekraftige løysingar. Gjennom å utvikle betre logistikk knytt til service av oppdrettsnøter vil vi redusere klimagassutslepp, auke gjenbruk og utvikle system for dokumentert gjenvinning.