Smittemodell med skottelus

Offentlig prosjektsammendrag

Lakselus (Lepeophtheirus salmonis) er eit stort problem både i norsk og internasjonal oppdrettssamanheng. Det blir lagt ned store ressursar for å forebygge og behandle lakselus både gjennom teknologiske nyvinningar, profylaktiske tiltak som vaksineutvikling, samt medikamentelle og ikkje-medikamentelle behandlingsstrategiar. Skottelus (Caligus elongatus) var, som namnet tilseier, tidlegare ei stor utfordring i skotsk lakseoppdrett. I dei seinare åra har ein derimot opplevd skottelusa som eit aukande problem også i Noreg, spesielt i dei nordlegaste delane av landet. Skottelusa er ikkje vertsspesifikk i like stor grad som lakselusa, og har lågare toleranse for ferskvatn. Det er vanleg at lakselus og skottelus kan opptre samtidig på laksefisk, men lite er kjend om ein eventuell interaksjon mellom artane. Ein ko-infeksjon vil potensielt kunne svekke fisken og gi gunstige forhold for begge artar lus, eller i motsatt fall gi kryssimmunitet som hindrar påslag av begge artar lus. Alternativt kan der vere mekanismar som favoriserer lakselusa foran skottelusa eller omvendt. Kunnskap om dynamikken ved ein koinfeksjon vil vere nyttig for til dømes å kunne evaluere effekt av genetisk resistens mot dei to luseartane. Prosjektet tek sikte på å etablere smittemodellar med skottelus, samt kosmitte med lakselus og skottelus.